بافڵ جەلال تاڵەبانی، سەرۆكی یەكێتیی نیشتمانیی كوردستان لە دەباشان پێشوازیی لە ماكسیم رۆبین، كونسوڵی گشتیی روسیا لە هەرێمی كوردستان كرد.
لەدیدارێكدا پەرەپێدانی پەیوەندییەكان و فراوانكردنی هەماهەنگییەكان لەچوارچێوەی پاراستنی بەرژەوەندییە باڵاكان و سەقامگیریی ناوچەكە جەختیلێكرایەوە.
لە درێژەی دیدارەكەدا دوایین رووداو و پێشهاتە سیاسییەكانی رۆژهەڵاتی ناوەڕاست بەتایبەت دۆخی سوریا گفتوگۆیان لەبارەوەكرا، هەردوولا گفتوگۆ و لێكتێگەیشتنیان وەك بنەمای چارەسەری كێشەكان و پاراستنی مافی هەموو نەتەوە و پێكهاتەكانیان لەچوارچێوەی وڵاتێكی سەقامگیردا دووپاتكردەوە.
سەرۆك بافڵ جەلال تاڵەبانی ئاماژەی بە سیاسەتی نیشتمانییانەی یەكێتی بۆ كۆی پرسەكان كرد و رایگەیاند، چارەسەری ئاشتییانەی كێشەكان و گەڕانەوە بۆ مێزی گفتوگۆ سیاسەتی كاركردنی ئێمەیە، هەر هەوڵێكیش لەچوارچێوەی پاراستنی مافەكانی گەلی كورد و سەقامگیریی ناوچەكە بدرێت پشتیوانیی لێدەكەین، دۆخی ئەمڕۆی سوریاش پێویستی بە لێكتێگەیشتن و هاوبەشیی راستەقینە هەیە، هیوادارین هەموولایەك بەم رۆحییەتەوە هەوڵ بۆ داهاتووی وڵاتەكە و ژیانی خەڵكەكەی بدەن.
پێكهێنانی حكومەتی نوێی هەرێمی كوردستان تەوەرێكیتری دیدارەكە بوو و لەوبارەیەوە سەرۆك بافڵ روونیكردەوە، گۆڕانكاریی ریشەیی لە پڕۆسەی حكومڕانی پێویستییەكی گرنگی قۆناغەكەیە و پێویستە حكومەتی داهاتوو خزمەتگوزارییەكانی بەشێوەیەكی دادپەروەرانە پێشكەشبكات و ئامانجەكەی بەهێزتركردن و ئاوەدانكردنەوەی كوردستان بێت نەك جیاكاری و قۆرخكردنی دەسەڵات لەپێناو بەرژەوەندییە حزبییەكاندا.
