ئەمڕۆ 17ی مانگی 12یە، کەمتر لە دوو هەفتە ماوە بۆ چوونە ناو ساڵێکی نوێ، لە زۆرێک لە وڵاتانی جیهان، خەڵک سەرقاڵی ئامادەکارییەکانن بۆ پێشوازی لە ساڵی نوێ و چێژوەرگرتن و ئامادەکردنی پلانی ساڵی 2025، بەڵام فەرمانبەران و مووچەخۆران و هاوڵاتییانی هەرێمی کوردستان، چاوەڕوانن رۆژەکان تێپەڕێت و سەرەیان بێت بۆ وەرگرتنی مووچەی مانگی 10 کە دەبوایە بەر لە دوو مانگ دابەشبکرێت.
فەرمانبەران و مووچەخۆران و خانەنشینانی هەرێمی کوردستان باس لەوە دەکەن، لە ساڵی 2014وە تاوەکو ئەمڕۆ بە هیوای ئەوەن کێشەی مووچە چارەسەر ببێت، بەڵام هەموو ساڵێک ئەم بابەتە بە هەمان شێوە دووبارەدەبێتەوە و هەمان کێشە سەرهەڵدەداتەوە.
ئەمڕۆ 17ی 12 دوو مانگ بەسەر راگەیاندنی کۆتا لیستی مووچە کە لیستی مووچەی مانگی 9 بوو تێپەڕبوو لە 17ی 10دا مووچەی مانگی 9 دابەشکرا، فەرمانبەران چەند جارێک دووپاتیان کردووەتەوە، کە بەرچاوروونیان نییە لەبارەی مووچەی مانگەکانی 11 و 12یانەوە.
سەرەڕای ئەوەی خەڵک چاوەڕوانی وەرگرتنی مووچەی مانگەکانی 10 و 11 بوون، سەرەڕای ئەوەی بەشێک لە میدیاکانیش بەردەوام باسیان لە دابەشکردنی دوو مووچە بەیەکەوە دەکرد، بەڵام لە کۆتاییدا تەنها دابەشکردنی مووچەی مانگی 10 راگەیەندرا.
