بەڕێوەبەری بەرگریی شارستانیی کۆیە رایگەیاند، لە رووداوی ئاگرکەوتنەوەکەی شەوی رابردووی شاری کۆیە خاوەنی ماڵەکە گیانیلەدەستداوە و نەوەیەکیشیان وەک تۆمەتباریی رووداوەکە ناسێنراوە.
عەمید گۆران ئەحمەد بەڕێوەبەری بەرگریی شارستانیی کۆیە بە تۆڕی میدیایی ئێستای راگەیاند، شەوی رابردوو لە کاتژمێر 10:50 خولەک ئاگادارکراینەوە لە رووداوێکی ئاگرکەوتنەوە لە قەزای کۆیە دوای گەیشتنی تیمەکانمان بە ماوەیەکی کەم توانرا ئاگرەکە کۆنتڕۆڵبکرێت.
ئاماژەی بەوەشکرد، بەپێی لێکۆڵینەوەکان، لەلایەن تۆمەتبارێکەوە تەقە لە ماڵەکە کراوە، فیشەک بەر تانکی بەنزینی ئۆتۆمبێلێک کەوتووە کە لە حەوشەکەدا بووە و بەو هۆیەوە ئۆتۆمبێلەکە تەقیوەتەوە و ئۆتۆمبێلەکە و بەشی پێشەوەی ماڵەکە ئاگری گرتووە.
باسیلەوەشکرد، بەهۆی رووداوەکەوە خاوەنی ماڵەکە کە دەکاتە باپیری تۆمەتبار گیانیلەدەستداوە و زیانی زۆری ماددیش بەر ماڵ و ئۆتۆمبێلەکە کەوتووە.
بەپێی ئەو زانیارییانەی دەست تۆڕی میدیایی ئێستا کەوتوون، لێکۆڵینەوەکانی ئاسایش و پۆلیسی کۆیە بەردەوامن تا ئێستا نەتوانراوە تۆمەتبار دەستگیربکرێت.
