دوای ئەوەی ئاژانسی هەواڵییەکان بابەتێکیان بڵاوکردەوە کە لە دادگای فیدراڵیی مانهاتن، سكاڵایەكی تاوان تۆماركراوە لەسەر بەرپرسێك لە سوپای پاسدارانی ئێران بە تۆمەتی ئەوەی كەسێكی راسپاردووە بۆ دانانی پلانێك بۆ چاودێریكردن و كوشتنی ترەمپ، ئێران وەڵامی ئەو تۆمەتەی دایەوە.
ئەمڕۆ شەممە، ئیمساعیل بەقائی، وتەبێژی وەزارەتی دەرەوەی ئێران رایگەیاند، ئەو تۆمەتانەی باس لەوەدەکەن ئێران بەشداربووە لە دانانی پلان و بەشداریکردن لە هەوڵی تیرۆرکردنی بەرپرسانی پێشوو و ئێستای ئەمریکا، دوورن لە راستییەوە و بەتەواویی رەتدەکرێنەوە.
وتەبێژی وەزارەتی دەرەوەی ئێران ئاماژەی بە تۆمەتە هاوشێوەکانی رابردوو کرد کە لە لایەن کۆماری ئیسلامیی ئێرانەوە بە تەواوی رەتکرانەوە و دواتریش سەلمێندران کە راست نەبوون.
ئاماژەی بەوەشکرد، دووپاتکردنەوەی ئەو تۆمەتە لە ئێستادا پیلانێکی قەوارەی زایۆنی و گرووپە دژە ئێرانییەکانە بە ئامانج بۆ ئاڵۆزکردنی بابەتە پەیوەندیدارەکانی نێوان ئەمریکا و ئێران.
جەختیشیکردەوە، کۆماری ئیسلامی ئێران بۆ گەیشتن بە مافەکانی نەتەوەی ئێران، کەڵک لە هەموو ئامڕازە رەوا و یاساییەکان لە ئاستی ناوخۆ و نێودەوڵەتییدا وەردەگرێت.
