کۆمسیۆنی هەڵبژاردنەکانی عێراق ژمارەی سەرپێچی و ساڵاکانی بانگەشەی ئاشکراکرد و هۆشدارییەکیش بە لایەنە سیاسییەکان دەدات.
جومانە غەلای، وتەبێژی کۆمسیۆنی باڵای سەربەخۆی هەڵبژاردنەکانی عێراق، بە تۆڕی میدیایی ئێستای راگەیاند، تاوەکو ئێستا 34 سەرپێچیی بانگەشەی لایەنە سیاسییەکان و 44 سکاڵا لەلایەن لیژنەی ناوەندیی بەدواداچوونی کۆمسیۆنەوە تۆمارکراون.
باسی لەوەش کرد، بەپێی یاسای هەڵبژاردن، پێویستە کاندید و حزب و هاوپەیمانییەکان دوای رۆژی دەنگدان لە ماوەی 30 رۆژدا سەرجەم پۆستەر و ریکلامەکانیان لێبکەنەوە.
وتیشی، ئەگەر لەو ماوەیەدا لایەنە سیاسییەکان پۆستەر و ریکلامەکانیان لێنەکردەوە کە بۆیان دیاریکراوە، ئاگادار دەکرێنەوە ئەگەر دوای ئاگادارکردنەوەکە لە ماوەی 10 رۆژدا ئەو کارەیان نەکرد، ئەوە شارەوانی خۆی بەو کارە هەڵدەستێت، بەڵام دەبێت لایەنە سیاسییەکان تێچووەکەی لەئەستۆ بگرن.
رۆژی هەینی، 18ی تشرینی یەکەمی 2024، دەنگدانی تایبەت و رۆژی 20ی تشرینی یەکەمی 2024 دەنگدانی گشتی بۆ هەڵبژاردنی خولی شەشەمی پەرلەمانی کوردستان بەڕێوەدەچێت، لایەنە سیاسییەکان کێبڕکێ لەسەر 100 کورسیی پەرلەمان دەکەن.
