لە ریزبەندی ئەو رۆژانەی رێکخراوی نەتەوەیەکگرتووەکان دیاریکردووە، ئەمڕۆ وەک رۆژی جیهانیی تەندروستیی دەروونی دەستنیشانکراوە.
بەپێی نوێترین راپۆرتی رێکخراوی تەندروستیی جهیانیی و سندوقی نەتەوەیەکگرتووەکان بۆ منداڵان، لە هەر حەوت منداڵێک یەکێکیان بەدەست نەخۆشییەکانی پەیوەست بە تەندروستیی عەقڵییەوە دەناڵێنن.
رێکخراوی تەندروستیی جیهانیی 10 ی ئۆکتۆبەری وەک رۆژی جیهانیی تەندروستیی دەروونی دیاریکردووە و ساڵانە لەم رۆژەدا چەندین چالاکی جۆراوجۆر بە ئامانجی هۆشیارکردنەوەی کۆمەڵگا لە تەندروستیی دەروونی بە تایبەت منداڵان و هەرزەکاران ئەنجامدەدات.
بەپێی داتاکان ئەو منداڵ و هەرزەکارانەی لە تەمەنی 10-19 ساڵاندان، تووشی دۆخی خەمۆکی و دڵەڕاوکێ و تێكچوونی رەفتاری دەبن، بە شێوەیەک سێ یەکی منداڵان پێش گەیشتن بە تەمەنی 14 ساڵان تووشی نەخۆشییە دەروونییەکان دەبن و نیوەی ئەمانەش پێش گەیشتنیان بە تەمەنی 18 ساڵان نیشانەکانیان لێدەردەکەوێت.
