سەرۆكی هەرێمی كوردستان لەبارەی دەستپێكردنی بانگەشەی هەڵبژاردنەوە پەیامێكی بڵاوكردەوە و دەڵێت، “لە هەموو شوێنێك چاویان لەسەر ئەم هەڵبژاردنەیە و دەبێت بانگەشە وێنەیەكی جوانی هەرێم پیشانبدات”.
نێچیرڤان بارزانی، سەرۆكی هەرێمی كوردستان ئاماژەی بەوە كرد، ”داوادەكەم بانگەشەی هەڵبژاردن بە ئارامی بەڕێوەبچێت و پێویستە بانگەشەی هەڵبژاردن رەنگدانەوەی فرەڕەنگیی پێكهاتەكان بێت و نەبێتە هۆی دابەشكردنی كۆمەڵگە”.
ئەوەشی خستەڕوو، ”دەبێت بانگەشە وێنەیەكی جوانی هەرێمی كوردستان پیشان بدات و بەجۆرێك نەبێت ببێتە مایەی دروستبوونی گرژی لە نێوان لایەنەكان”.
لە كۆتایی پەیامەكەیدا سەرۆكی هەرێم رایگەیاند، ”لە هەموو شوێنێك چاوی دۆستانمان لەسەر ئەم هەڵبژاردنەیە و ئەركی هەموومانە پێكەوە كار بۆ سەركەوتنی بكەین، هەڵبژاردنی پەرلەمانێكی بەهێز دەرفەت و یارمەتیدەرێكی بەهێزە بۆ پتەوكردنی سیستمی دیموكراسی و پاراستنی هەرێمی كوردستان”.
