بەڕێوەبەرایەتیی گشتیی دژەتیرۆر رایدەگەیەنێت، ئۆپەراسیۆنێك بۆ لەناوبردنی تیرۆریستانی داعش لە سنووری كەركوك ئەنجامدا.
بەڕێوەبەرایەتیی گشتیی دژەتیرۆر لە راگەیەندراوێكدا بڵاویكردووەتەوە، لە درێژەی هەوڵ و چالاكییە بەردەوامەكانی بەڕێوەبەرایەتیی گشتیی دژەتیرۆر بۆ پاراستنی ئارامی و ئاسایشی هەرێمی كوردستان و عێراق، دوای كۆكردنەوەی زانیاریی هەواڵگری ورد و دروست، ئۆپەراسیۆنێكی بە هاوبەشی لەگەڵ دەزگای دژەتیرۆری عێراق و هاوپەیمانیی نێودەوڵەتیی بۆ ڕووبەڕووبونەوەی داعش لە سنووری پارێزگای كەركوك ئەنجامدا.
ئاماژە بۆ ئەوەش كراوە، لە ئۆپەراسیۆنەكەدا توانرا ژمارەیەك مۆڵگە و حەشارگەی پاشماوەكانی ڕێكخراوی تیرۆرستیی داعش لەناوببرێن و ڕێگری بكرێت لە بەكارهێنانی ئەو ناوچانە وەك پەناگەیەك.
هەر لە راگەیەندراوەكەدا هاتووە، دژەتیرۆر و هاوبەشە ناوخۆیی و نێودەوڵەتییەكانی بەردەوامدەبن لەم چالاكییانە تالەناوبردنی دوایین ئەندامی رێكخراوە تیرۆریستییەكان لە كوردستان و عێراق.
