وەزارەتی خوێندنی باڵای هەرێم رایدەگەیەنێت، نمرەی دەرچووانی پۆلی دوانزەی ئامادەیی رادەستی وەزارەتی خوێندنی باڵا کرا و لە چەند رۆژی داهاتوودا زانکۆلاین کارا دەکرێت.
لە راگەیەندراوێکدا وەزارەتی خوێندنی باڵا و توێژینەوەی زانستیی هەرێم ئاماژە بەوە دەکات، ”نمرەی دەرچووانی پۆلی دوانزەی ئامادەیی بەهەرسێ بەشی زانستی و وێژەیی و پیشەیی کە ژمارەیان 55 هەزار 720 دەرچووە لەلایەن وەزارەتی پەروەردەوە رادەستی وەزارەتی خوێندنی باڵا کرا بەمەبەستی کارکردن لەسەریان لەچوارچێوەی سیستمی زانکۆلاین بۆ خوێندن لە زانکۆ و پەیمانگەکان، هاوکات بەپێی ئامارەکانی وەزارەتی پەروەردە رێژەی دەرچووانی قۆناغی دوانزەی ئامادەیی لە ئەمساڵدا بە بەراودر بە ساڵی رابردوو 19 هەزار دەرچوو زیادیکردوە”.
بەپێی راگەیەندراوەکەی خوێندنی باڵای هەرێم ژمارەی دەرچووانی بەشەکانی زانستی و وێژەیی و پیشەییەکان و رێژەی نمرەی بەدەستهاتویو خوێندکاران خرانەڕوو بە شێوەیەک، ”دەرچووانی بەشی زانستی ژمارەیان 41 هەزار و 277، وێژەیی 13 هەزار و 541 و پیشەیی 902 دەرچووە بێجگە لە دەرچووانی خوێندنگا نێودەوڵەتییەکان”.
جەختلەوەشکراوەتەوە، ”وەزارەتی خوێندنی باڵا بۆ ساڵی خوێندنی 2024-2025 لەسەرجەم زانکۆ و پەیمانگە حکومییەکانی هەرێمی کوردستان زۆرترین دەرفەتی خوێندنی گشتی بەخۆڕایی بۆ دەرچووانی دوانزەی ئامادەیی دەرەخسێنێت، بەشێوەیەک دەرچووان بەپێی حەز و خولیا و کۆنمرەکانیان لە ناوخۆی هەرێمی دەرفەتی خوێندنی یەکسان و دادپەروەریان بۆ بڕەخسێندرێت”.
دەشڵێت، ”هەموو ئەو کەسانەی کە لە خوار ساڵی 2000ەوە دەرچوون و ناویان لەناو سیستمی زانکۆلایندا نییە، پێویستە لە رێگەی لینکێکی تایبەتەوە کە وەزارەتی پەروەردە دایدەنێت دواتر سەردانی وەزارەتی پەروەردە دەکەن بۆ وەرگرتنی یوزەرنەیم و پاسۆرد بەمەبەستی پڕکردنەوەی زانکۆلاین”.
