بافڵ جەلال تاڵەبانی، سەرۆكی یەكێتیی نیشتمانیی كوردستان لە بارەگای مەكتەبی سیاسی لە هەولێر لەگەڵ لێپرسراوی بازنەكانی سنووری پارێزگای هەولێر كۆبووەوە.
لە كۆبوونەوەكەدا كە رەفعەت عەبدوڵا، دەرباز كۆسرەت رەسوڵ، ئاسۆ مامەند و رێواز فایەق، ئەندامانی مەكتەبی سیاسی و سەعدی ئەحمەد پیرە، وتەبێژی یەكێتی ئامادەبوون، سەرۆك بافڵ جەلال تاڵەبانی سوپاس و پێزانینی ئاڕاستەی هەولێرییە سەربەرزەكان كرد كە ماندوونەناسانە هەوڵ بۆ بەدیهێنانی گۆڕانكاری و راستكردنەوەی رێڕەوی چەوتی حوكمڕانی دەدەن.
ئاماژەی بەوەشكرد، یەكێتیی نیشتمانیی كوردستان وەك هەمیشە لەگەڵ هەولێرییە خۆڕاگرەكان دەمێنێتەوە و ئەمجارە پێكەوە لە هەولێری پایتەختەوە مژدەی بوونیادنانی حوكمڕانییەك رادەگەیەنین كە خزمەتكاری هاوڵاتییان بێت نەك یاری بە ژیان و چارەنووسییانەوە بكات.
لەبارەی بەڕێوەچوونی هەڵبژاردن و گۆڕانكاریی لە دەسەڵاتدا، سەرۆك بافڵ رایگەیاند، “یەكێتیی نیشتمانیی كوردستان جارێكیتر و لەژێر هیچ ناوێكدا رێگا بە جیاكاری و تاكڕەوی لە بەڕێوەبردندا نادات، ئەوەی دەمانەوێت و هەر دەبێت رووبدات، هێنانەكایەی قۆناغێكی نوێی حوكمڕانییە كە وەڵامدەرەوەی خواست و داواكاریی هاوڵاتییان بێت و توانای چارەسەركردنی كێشەی مووچە و قووتی خەڵكی هەبێت و ژیان و گوزەرانی خەڵكەكەی نەكاتە قوربانیی ململانێ سیاسی و ناڕەواكان، بۆیە هەڵبژاردنی ئەمجارە دەرفەتێكی گرنگ و چارەنووسسازە تاوەكو هەموومان پێكەوە بەرۆ‌حێكی نیشتمانی و بەرپرسیارانەوە هەنگاو بۆ داهاتوویەكی سەقامگیرتر بنێین و داهاتوویەكی خۆشگوزەرانتر بۆ نەوەكانمان بوونیادبنێین”.
لەكۆتایی كۆبوونەوەكەشدا سەرۆكی یەكێتی رووی لە هەولێرییە سەربەرزەكان كرد و رایگەیاند، لە رابردوودا بە پشتیوانیی خوای گەورە و خەڵكە دڵسۆزەكەمان، هەنگاوی گەورە و كاریگەرمان ناوە، دڵنیام لە داهاتووشدا بە رۆحێكی كۆڵنەدەرانەی یەكێتییانە و كوردانەوە سەركەوتنی گەورە تۆماردەكەین، هەولێر خاكی پیرۆزی كوردستانە و موڵكی هەموو ئەوانەیە كە بە دڵ كوردستانیان خۆشدەوێت نەك ئەوانەی لەپێناو بەرژەوەندیی تەسكی حزبی و كەسیدا بەكاریدەهێنن.
