کاتژمێر چواری بەرەبەیانی ئەمڕۆ 22 ی کانونی یەکەم، لە شەقامی 120 مەتری شاری هەولێر، بەهۆی پێکدادانی دوو ئۆتۆمبیلەوە ژن و مێردێک گیانیان لە دەستدا.
فازڵ حاجی، وتەبێژی هاتوچۆی هەولێر بە تۆڕی میدیایی ئێستای وت، “پێکدادانەکە لە نێوان ئۆتۆمبیلێکی دۆج چارجەر و تانکەرێکدا لە نزیک لوپی دابەزینی ڕێفای مەخمور ڕویداوە و هۆکاری ڕوداوەکەش بۆ تیژڕەوی ئۆتۆمبیلە تایبەتەکە دەگەڕێتەوە”.
وتەبێژی هاتوچۆی هەولێر ئاشکرایکرد، بەپێی پێشبینی ئەوان پێدەجێت ئۆتۆمبیلە دۆج چارجەرەکە لە نێوان 180 بۆ 200 ڕۆشتبێت و خۆی کێشابێت بە تانکەرەکەدا و بەهۆی خێرایی پێکدادانەکە تانکەرەکە لە ڕێڕەوی خۆی لایداوە.
فازڵ حاجی ئاماژەی بەوەشکرد “خەتاباری ڕوداوەکە ٪100 دراوە بەسەر ئۆتۆمبیلە تایبەتەکەدا چونکە تانکەرەکە لە خەتی خۆی ڕۆشتووە و کێشەی نەبووە.
ئەوەی تێبینییە بەلای بەکارهێنەرانی تۆڕە کۆمەڵایەتییەکانەوە و وەک لە وێنەکانیشدا دەردەکەوێت سەرەڕای تازەی ئۆتۆمبیلە دۆج چارجەرەکە هیچ ئێرباگێکی لە ڕوداوەکەدا نەتەقیووە.
