رۆژانە قسەی جیاواز لەبارەی کاریگەرییەکای سۆشیاڵمیدیا و تەکنەلۆژیای نوێ و مۆبایلە زیرەکەکانەوە دەبیستین، بەڵام هیچ کامیان لەوە دەرناچن کە زۆر بەکارهێنانیان زیان بە مرۆڤ دەگەیەنن و زۆرێک لە توێژینەوەکان ئامۆژگاری مرۆڤ دەکەن بەشێوەیەکی تەندروست کاریان پێبکەن.
ئەنجامی حەوت تاقیکردنەوە کە زیاتر لە هەزار و 200 ئەمریکی و کەنەدی بەشدارییان تێداکردبوو، دەریخست کە سەیرکردنی کورتەڤیدیۆی سۆشیاڵمیدیاکان، یان بەخێرایی چاوپێداخشاندنیان وا دەکات مرۆڤ زیاتر هەست بە بێزاری بکات نەوەک کەمتر.
توێژەری سەرەکی توێژینەوەکە کە ناوی کاتی تام-ە و خوێندکاری پۆست دکتۆرایە رایگەیاندووە، بە خێرایی گۆڕینی ڤیدیۆکان لە دانەیەک بۆ دانەیەکی دیکە، کاریگەری نەرێنی زیاددەکات لەسەر مرۆڤ نەوەک کەمی بکاتەوە، چونکە وەک ئەوە نییە مرۆڤ تەماشای یەک ڤیدیۆ بکات و تا کۆتایی لەسەری بمێنێتەوە.
ئەگەر خەڵک ئەزموونێکی چێژبەخشتریان دەوێت لەکاتی سەیرکردنی ڤیدیۆکاندا، دەتوانن هەوڵبدەن سەرنجیان لەسەر ناوەڕۆکەی ئەو ڤیدیۆیە بێت کە تەماشای دەکەن و گۆڕانکاری کەم و سنوورداربکەن، چونکە بەو جۆرە چێژێکی زۆر باشتری لێوەردەگرن وەک لەوەی لە ڤیدۆیەک بۆ دانەیەکی دیکە بڕۆن.
ئەنجامی توێژینەوەکە دەریخستووە کە بەشداربووان ئەزموونی بینینی ڤیدیۆی درێژتر دڵخۆشکەری کردوون و مانادارترە لە گەڕان بەناو ژمارەیەک کورتەڤیدیۆدا، بەهۆی ئەوەی بەکارهێنانی مۆبایلە زیرەکەکان بێزاری زیاددەکات و چێژوەرگرتن لە بارودۆخە کۆمەڵایەتییەکان تێکدەدات.
