د. ئەحمەد كەركوكی، ئەندامی ئەنجومەنی پارێزگای كەركوك لە لێدوانێكدا بە تۆڕی میدیایی ئێستای راگەیاند، ئەمڕۆ وەكو ئەندامانی ئەنجومەنی پارێزگای كەركوك لە فراكسیۆنی كەركوك هێز و ئیرادەمانە و فراكسیۆنی بابلیۆن لەگەڵ محەمەد شیاع سودانی سەرۆك وەزیرانی عێراق لە بەغداد كۆبووینەوە و لە سەرەتای كۆبوونەوەكەدا سودانی باسی لە گرنگيی هەوڵەكانی یەكێتيی نیشتمانيی كوردستان بە سەرۆكایەتیی سەرۆك بافڵ جەلال تاڵەبانی بۆ دروستكردنی حكومەتێكی خۆجێی فرەنەتەوە و لەچوارچێوەی سیاسەتی چەپكەگوڵەكەی سەرۆك مام جەلال كرد.
دەشڵێت، “سودانی ئاماژەیدا بە گرنگیی دابەشكردنی پۆستەكان بەپێی بەركەوتەی هەڵبژاردن و باسیشی لە شێوازی دابەشكردنی پۆستەكان و گرنگی هەوڵی لایەنە سیاسیيەكان لە بەغداد كردووە كە كەركوك تایبەتمەندیی خۆی هەیە و پێویستە رەچاوی ئەو تایبەتمەندییە بكەین”.
لە كۆبوونەوەكە سەرۆك وەزیرانی عێراق راشیگەیاندووە، “كەركوك زۆرترین رێژەی بەشداریی هەڵبژاردنی تێدابووە لە عێراقدا ئەمەش مانای هیوا و ئومێدی كەركوكییەكانە بە نوێنەرەكانیان و خەمی ئێمەشە پێكهێنانی حكومەتێكی خۆجێیە بە بەشدرایی سەرجەم پێكهاتەكان لەپێناو خزمەتكردنی خەڵكی شارەكە و دڵنیام هەموولایەك سوود لە هەڵەكانی ڕابردوو وەردەگرین”.
لە كۆبوونەوەكەدا سودانی رایگەیاندووە، “چاوەڕوانين بەزووترین كات و بەر لە تەواوبوونی ئەو وادە یاساییەی بۆ ئەندامان دانراوە بۆ یەكلاییكردنەوەی پۆستی پارێزگار و سەرۆكی ئەنجومەنی پارێزگا و جێگرەكانیان یەكلاییبكەنەوە”.
