وتەبێژی بەڕێوەبەرایەتیی گشتیی بەرگریی شارستانیی هەرێم، رایدەگەیەنێت، لەسەرەتای ئەمساڵەوە تاوەکو ئێستا 49 حاڵەتی خنکان لە هەرێم تۆمارکراون.
سەرکەوت کاڕەش، وتەبێژی بەڕێوەبەرایەتیی گشتیی بەرگریی شارستانیی هەرێم، بە تۆڕی میدیایی ئێستای راگەیاند، لەسەرەتای ئەمساڵەوە تاوەکو ئێستا 49 حاڵەتی خنکان لەسەرتاسەری هەرێم تۆمارکراون.
باسی لەوەش کرد، لەو ژمارەیە 9 حاڵەت لە هەولێر، 9 حاڵەت لە سلێمانی، 6 حاڵەت لە دهۆک و حاڵەتەکانی دیکەش لە پارێزگای هەڵەبجە و ئیدارە سەربەخۆکانی گەرمیان، راپەڕین، سۆران، لەگەڵ ناوچەکانی دیکەی هەرێم تۆمارکراون.
دەستەی پارستن و چاککردنی ژینگەی هەرێم رایگەیاند، رێژەی خنکانی گەنجان لە ئاودا نۆ ئەوەندەی خنکانی کەسانی بەتەمەنە.
ئەوە لەکاتێکدایە ئەمڕۆ 25ی تەمموز بە رۆژی جیهانیی خۆپاراستن لە خنکان دیاریکراوە.
ساڵانە نزیكەی 236 هەزار كەس لە جیهاندا دەخنكێن، رووداوەكان زۆرتر لەنێوان منداڵانی تەمەن 5 بۆ 14 ساڵاندا روودەدەن.
