بە بڕیاری پارێزگاری هەولێر لە ئەمڕۆوە دەرۆزەکار و فاڵگرەوە و ئەوانەى لە بەردەم پیشانگاکانی فرۆشتنى ئۆتۆمبێل کاردەکەن و لە ترافیكەکان کەلوپەل دەفرۆشن دەستگیردەکرێن.
پارێزگاری هەولێر بڵاویکردەوە، لە سەر داواکارى و گلەیی و گازندەى هاوڵاتییان و لە پێناو نەهێڵانى دیاردەى ناشارستانى و لە چوارچێوەی هەڵمەتی رێگەگرتن لە رووداوى نەخوازراو و دوور لە ئادابى گشتی و بەهۆی سەرپێچیی و پابەندنەبوون بە بڕیار و رێنمایەکان، لە ئەمڕۆوە چوارشەممە لەلایەن پۆلیسی هەولێرەوە هەڵمەتی دەستگیركردنى دەرۆزەکار و فاڵگرەوە و هەموو ئەوانەى لە بەردەم پیشانگاکانی فرۆشتنى ئۆتۆمبێل کاردەکەن و ئەو منداڵ و تازەلاوانەی لە ترافیكەکان کەلوپەل دەفرۆشن دەستیپێکرد.
ئاشکراشیکرد، هەڵمەتەكە بەردەوام دەبێت و سەرجەم ئەو ژنانەی بە بیانووی دەرۆزەکردن و فاڵگرتنەوە لە ناوچەی پیشەسازیی باشوور و باکوورى شارى هەولێر هەن دەستگیردەكرێن و رێكاری یاساییان لە بەرمبەردا دەگیرێتەبەر.
