شارەزایانی بواری خۆراک ئاماژە بەوە دەکەن، خواردنی هێلکەی کوڵاو هەستی تێربوون دەبەخشێت بەهۆی بوونی پرۆتین و چەوری تیایدا.
ئەوان دەڵێن، چەند رێگەیەک هەن بۆ سنووردارکردنی هەستکردن بە برسێتی، وەک خواردنی ژەمێكی سووك و ساندویچ و هتد، بەڵام کەم کەس دەزانێت کە باشترە لە نێوان ژەمە سەرەکییەکاندا یەک هێلکەی کوڵاو بخورێت.
ئەگەر کەسێک هەوڵی خواردنی خۆراکی تەندروست و پەیڕەوکردنی رێجیمێکی هاوسەنگ دەدات، ئەوا پێویستە پرۆتین بە رێژەیەکی زۆر بخورێت، دواتریش چەوری و دواجاریش کاربۆهیدرات.
هێلکە رێژەیەکی بەرزی پرۆتین و چەوری تێدایە، بەوپێیەی هێلکەیەکی کوڵاو شەش گرام لە مادەی ئۆرگانیکی یەکەم و پێنج گرام لە مادەی ئۆرگانیکی دووەم لەگەڵ ڤیتامینەکانی گروپی بی لەخۆدەگرێت، كۆبوونەوەی ئەمانەش پێكەوە هەستی تێری بۆ ماوەیەكی زۆر دەبەخشن.
بەڵام بۆچی پرۆتین و چەورییەکان یارمەتیی هەستكردن بە تێربوون دەبەخشن؟
پرۆتین و چەورییەکان زۆر زیاتر لە پێکهاتە ئۆرگانییەکانی دیكە لە گەدەدا دەمێننەوە. واتە جەستە کاتێکی زۆری دەوێت تا هەرسیان بکات و دواتر هەڵبمژرێت، لەکاتێکدا هەرسکردنی کاربۆهیدراتەکان 30-60 خولەکی دەوێت، دوای ئەوە دەچنە ناو ریخۆڵەکانەوە. کاتێک لەگەڵ پرۆتین و چەورییەکان دەخورێت (بۆ نموونە لەگەڵ هێلکەی کوڵاو)، رەنگە نزیکەی سێ کاتژمێر بخایەنێت تا هەرسکردنیان.
بە وتەی شارەزایان، بۆ ئەوەی زۆرترین سوود لە هێلکەی کوڵاو وەربگریت، باشترە لەگەڵ نانی دانەوێڵەیی تەواو، سەوزە و بەرهەمە شیرەمەنیەکان بخورێت.
