ئەسیر داود غرێری، وەزیری بازرگانیی عێراق رایگەیاند، سەرەڕای ئەوەی پڕۆسەی وەرگرتنی گەنم بەردەوامە و نەوەستاوە، بەڵام ئاستی وەرگرتنی گەنم لە ئەمساڵدا، ئاستی ساڵی رابردووی تێپەڕکردووە کە پێنج ملیۆن و 500 هەزار تۆن گەنم بوو، ئاماژەی بەوەشدا، ئاستی خۆبژێوی لە بەرهەمی گەنم بەدەستهاتووە لە هەرێم و عێراق.
وەزیری بازرگانیی عێراق ئاماژەی بەوەشکرد، گرنگیدان بە کشتوکاڵ لە هەرێمی کوردستان، بەشێکی ستراتیجییە بنەڕەتییە و هاوشانی هەوڵەکانی حکومەتی عێراقە لە بواری کشتوکاڵدا کە دەیەوێت وەک هۆکارێکی کاریگەری گەشەسەندن سوودی لێ وەربگرێت.
باسی لەوەشکرد، عێراق و هەرێمی کوردستان تاوەکو لەسەر رێگەی گەشەسەندن و بووژاندنەوەی کەرتی کشتوکاڵ بێت، ئەوا لەسەر رێگەیەکی راستە بۆ دابینکردنی ئاسایشی خۆراک و بەرەوپێشبردنی وڵات.
