پزیشکێک چەند رێگاچارەیەک بۆ رێگریکردن لە سکچوون و رشانەوە دەخاتەڕوو.
د. پشدەر عبدوڵا، پزیشکی پسپۆڕی نەخۆشییەکانی منداڵان و گەشەی منداڵان، رایگەیاند، هۆکارەکانی سکچوون و رشانەوە زۆرن کەواتە لەخۆتەوە چارەسەر بەکارمەهێنە، چونکە چارەسەرەکانیشیان جیاوازن.
دەشڵێت، لەوانەیە هۆکارەکە ڤایرۆس یان بەکتریا یان پاڕاسایت یان خواردنی شیرینی یان هەستیاری بە پڕۆتین، یان نەخۆشیی گەنم و جۆ یان ژەهراوی بوون یان هەستیاری بەجۆرە خواردنێک یان کۆرۆنا یان چەندین هۆکاری دیکە بن.
لەبارەی رێنماییەکان بۆ رێگریکردن لەو نەخۆشییە د. پشدەر عەبدوڵا دەڵێت، بۆ رێگەگرتن لە تووشبوون بە سکچوون و رشانەوە باشترە ئەم هەنگاوانە بنێیت:
1-هەموو ئاوێک بکوڵێنە ئینجا ساردی بکەرەوە و بۆ خواردنەوە بەکاریبهێنە.
2-خواردن لەناو سەلاجە هەڵبگرە.
3-سەوزە و میوە پێش خواردنیان جوان بشۆرەوە.
4-زوو زوو دەستی منداڵەکەت بشۆ بەتایبەت دوای تەوالێت کردن.
5-پاک و خاوێنی تەوالێت و حەمام زۆر گرنگە.
6-بەکارنەهێنانی خاولی و پەرداخ و کەوچکی یەکتر.
7-دوورکەوتنەوە لەخواردنی دەرەوە بەتایبەت ئەوانەی سەر عەرەبانەکان.
8-باش کوڵاندنی گۆشت و خواردنەکان.
