دوای نزیكەی 12 کاتژمێر لە کەوتنەوەی ئاگرەکەی سەر رێگای هەولێر-گوێر تا ئێستا نەتوانراوە کۆنتڕۆڵبکرێت.
بەپێی ئەو زانیارییانەی دەست تۆڕی میدیایی ئێستا کەوتوون، دوای نزیكەی 12 کاتژمێر لە کەوتنەوەی ئاگرەکەی پاڵاوتگەیەک لەسەر رێگای هەولێر-گوێر نەتوانراوە کۆنتڕۆڵبکرێت و تەنانەت نەتوانراوە بڵێسەی ئاگرەکە کەم ببێتەوە.
هەر بەپێی زانیارییەکان، بەهۆی ئەوەی ئەو قیرە شلەی لەناو پاڵاوتگەکەدا ماون ئاگری گرتووە و تیمەکانی بەرگریی شارستانیی ناتوانن کۆنتڕۆڵی بکەن، پێشبینی ناکرێت تا کۆتاییهاتنی قیرەکە و سووتانی هەموو بڕەکەی بتوانرێت ئاگرەکە کۆنتڕۆڵبکرێت.
ئێستا زانیویەتی، تیمەکانی بەرگریی شارستانی، لەگەڵ ئەوەی توانیویانە لەرووی رووبەرەوە کۆنتڕۆڵی ئاگرەکە بکەن و رێگری لەوەبکەن رووبەرەکەی فراوان بێت، تا رادەیەک بێهیوان بتوانن خۆیان بە تەواوی کۆنتڕۆڵی بکەن و چاوەڕێن لەگەڵ سووتانی سەرجەم ماددە سوتێنەرەکانی شوێنەکە ئاگرەکە خۆی بکوژێتەوە.
