سەرۆكی یەكێتی جەخت لەسەر پێویستیی ئاشتی و سەقامگیری دەكاتەوە و رایدەگەیەنێت، ناکۆکی و ململانێکان خزمەت بە هیچ لایەک ناکەن.
بافڵ جەلال تاڵەبانی، سەرۆکی یەکێتیی نیشتمانیی کوردستان لە واشنتن لەگەڵ مایک کویگلی، ئەندامی ئەنجوومەنی نوێنەران، ئەندامی لیژنەی دابینكردنی بودجەی حكومەت و پڕچەککردنی هێزی پێشمەرگە لەلایەن وەزارەتی بەرگریی ئەمریكاوە کۆبووەوە.
کویگلی، دۆستی دێرینی كورد و ئەندامی كۆنگرەی كوردی-ئەمریكی-یە، كە ساڵی 2008 بۆ پەرەپێدانی بەرژەوەندییە نیشتمانییەکانی ئەمریکا و رەوەندی كوردی لە وڵاتەكە دامەزراوە.
لە دیدارەكەدا دۆخی هەرێمی کوردستان، عێراق و رۆژهەڵاتی ناوەڕاست گفتوگۆی لەبارەوەکرا و سەرۆک بافڵ جەلال تاڵەبانی وتی، “ناکۆکی و ململانێکان خزمەت بە هیچ لایەک ناکات و دەبێت هەموو هەنگاوەکان لەپێناو ئاشتی و سەقامگیریدا بێت”.
لەبارەی مەترسییەکانی تیرۆرەوە سەرۆك بافڵ رایگەیاند، بەردەوامیی هاریکارییەکان فاکتەری سەرەکیی ئارامی و ئاسایشی ناوچەکەن، ئەرکی هەموومانە پێکەوە رووبەڕووی مەترسییەکان ببینەوە و تیرۆر بنبڕ بکەین.
وتیشی، “سەرکەوتنی گفتوگۆکانی نێوان عێراق و ئەمریکا لە چوارچێوەی پاراستنی بەرژەوەندییە باڵاکان زۆر گرنگە و پێشوازیی لێدەکەین”.
