سەرۆك كۆماری عێراق رایدەگەیەنێت، هاوكاردەبن لە چارەسەركردنی پرسی بودجە و شایستە داراییەكانی هەرێم و فەرمانبەران.
بەپێی راگەیەندراوێكی سەرۆكایەتیی كۆماری عێراق تێیدا هاتووە، ئەمڕۆ شەممە، د. لەتیف جەمال رەشید سەرۆك كۆمار لە هەولێر لەگەڵ نێچیرڤان بارزانی سەرۆكی هەرێمی كوردستان كۆبووەوە و لە دیدارێكدا، كە جێگرانی سەرۆكی هەرێم و ژمارەیەك لە وەزیر و لێپرسراوانی هەرێم ئامادەیبوون، بارودۆخی گشتی وڵات و پێشهاتەكانی سەر گۆڕەپانی ئیقلیمی و ناوچەیی تاوتوێكران و جەختكرایەوە لەسەر گرنگیی پاراستنی ئاسایش و سەقامگیری و یەكخستنی هەوڵەكان بۆ پارێزگاریكردن لەو ئارامی و پێشكەوتنە ئەرێنییانەی لە وڵاتدا هاتوونەتەئاراوە.
لە راگەیەندراوەكەدا هاتووە، پەیوەندییەكانی نێوان حكومەتی عێراق و حكومەتی هەرێمی كوردستان تاوتوێكران و گرنگی چەسپاندنی رێككەوتنەكان و چارەسەركردنی تەواوەتی كێشەكان دووپاتكرانەوە و هاوكات ستایشی ئەو هەنگاوانە كران كە بوونەتەهۆی زیاتر بەرەوپێشبردنی پەیوەندییەكان و هەوڵەكان بۆ كۆتاییهێنان بە پرسە هەڵپەسێردراوەكانی نێوان هەردوولا.
لە دیدارەكەدا، سەرۆك كۆمار جەختی لەسەر گرنگیی دیالۆگ و وتووێژی بەردەوامكردەوە بۆ زاڵبوون بەسەر كێشە و گرفتەكان و دابینكردنی ژیانێكی شایستە بۆ هاوڵاتییان لە هەموو ناوچەكانی وڵاتدا.
هەروەها سەرۆك كۆمار ئاماژەی بەوەكرد، هاوكاردەبێت لە پتەوكردنی پەیوەندییەكانی نێوان حكومەتی عێراق و حكومەتی هەرێم و بە تەواوی چارەسەكردنی پرسی بودجە و شایستە داراییەكانی هەرێم و فەرمانبەران و هاوكات كاردەكات بۆ چارەسەركردنی گرفتەكانی بەردەم جووتیاران و وەرگرتنی بەرهەمی گەنم لەلایەن حكومەتی عێراقەوە.
باسی لەوەشكرد، كە بایەخی تەواو بە بەهێزكردنی پەیوەندییەكانی عێراق و هەرێمی كوردستان دەدات لەگەڵ وڵاتانی دراوسێ و ناوچەكە و جیهان.
