نێچیرڤان بارزانی سەرۆكی هەرێمی كوردستان، ئەمڕۆ پێنجشەممە فەرمانی هەرێمی بۆ بە قەزاكردنی خورماڵ واژوو كرد.
بەپێی راگەیەندراوێكی سەرۆكایەتیی هەرێم، نێچیرڤان بارزانی پاڵپشت بە یاسای سەرۆكایەتیی هەرێمی كوردستان، ژمارە (1)ی ساڵی 2005ی هەمواركراو و لەبەر رۆشناییی داواكاریی ئەنجومەنی وەزیرانی هەرێمی كوردستان لەمبارەیەوە، بڕیاریدا بە هێنانەكایەی قەزای خورماڵ لە سنووری پارێزگای هەڵەبجە بە هەمان سنووری ئێستای ناحیەی خورماڵ.
ئاماژە بۆ ئەوەش كراوە، ئەم بڕیارەی سەرۆكی هەرێمی كوردستان، لە ئەمڕۆوە جێبەجێدەكرێت و سەرجەم رێكارە ئیدارییەكان بۆ ئەم مەبەستە دەستپێدەكەن و بە قەزاكردنی خورماڵ دەبێتە هۆی باشتربوونی رەوشی ناوچەكە لە رووی خزمەتگوزاری و كارگێڕییەوە و خزمەتی زیاتر بە خەڵك و هاوڵاتییانی دەكات.
