بەڕێوەبەرایەتیی پۆلیسی راپەڕین بڵاویکردەوە، تۆمەتبارێک دەستگیرکراوە کە دوای رووداوێکی هاتوچۆ هەڵاتووە.
لە راگەیەندراوەکەی بەڕێوەبەرایەتیی پۆلیسی راپەڕیندا ئاماژە بەوەکراوە، ئۆتۆمبێلێکی جۆری تۆیۆتا کرۆلا لەگەڵ ماتۆڕسکیلێک خۆیان بەیەکدا کێشا و بەوهۆیەشەوە شۆفێری ماتۆڕسکیلەکە بریندار بوو، دوای رووداوەکە ئۆتۆمبێلەکە شوێنی رووداوەکەی جێهێشتووە.
پۆلیسی راپەڕین ئەوەشی خستووەتەڕوو، دوای بەدەستهێنانی زانیاری و ئاشکراکردنی ناسنامەکەی، شۆفێری ئۆتۆمبێلەکە لەلایەن هێزەکانیان لە بنکەی پۆلیسی راپەڕین و نووسینگەی نەهێشتنی تاوانی پشدەر دەستگیرکرا.
باس لەوەشکراوە، بریندارەکە گواسترایەوە بۆ نەخۆشخانەی گشتی قەڵادزێ و بەبڕیاری دادوەر بەپێی ماددەی 23 لە یاسایی هاتوچۆ شۆفێرەکە راگیراوە و دەستیش بەسەر ئۆتۆمبێلەکەیدا گیراوە و لێکۆڵینەوەکان بەردەوامن.
