وەزارەتی ئاوەدانكردنەوە و نیشتەجێكردن رایدەگەیەنێت، کارکردن بەشێوەیەکی چڕ و فراوان لە سەرجەم بڕگەکانی پڕۆژەی رێگای دووسایدی دەربەندیخان-کەلار بەردەوامە.
وەزارەتەكە دەشڵێت، لەئێستادا رێژەی ئەنجامدراوی پرۆژەکە زیاتر لە 75٪ی تێپەڕاندووە.
لە 16ی نیسانی رابردوو عوسمان حەمەسەعید، بەڕێوەبەری کۆمپانیای بێشکان، رایگەیاند، لەسەر بەڵێن و پشتیوانییەکانی قوباد تاڵەبانی، جێگری سەرۆکی حکومەتی هەرێم، کە بەڵێنی تەرخانکردنی بودجەی پرۆژەکەی دا، کارکردن لە پرۆژەی رێگای کەلار- دەربەندیخان، دەستپێدەکاتەوە.
وتیشی، “ئەگەر بڕەپارەی پێویستمان بۆ تەرخانبکرێت، تاوەکو کۆتایی ئەمساڵ پرۆژەکە تەواودەکەین”.
پێشتر دانا عەبدولکەریم، وەزیری ئاوەدانکردنەوە و نیشتەجێکردن رایگەیاند، لە ھەوڵەکانیان بەردەوامن بۆ تەواوکردنی پرۆژەکە و، ئەگەر گرفتی دارایی دروست نەبێت تاوەکو کۆتایی ئەمساڵ پرۆژەکە تەواو دەکرێت.
پرۆژەی رێگای دووسایدی دەربەندیخان-کەلار درێژییەکەی 41 کیلۆمەترە، بە تەواوبوونی، رێگای کاتژمێرێک و 25 خولەکی نێوان ئەو دوو شارە، دەبێتە 40 خولەک و لەئێستاشدا بەشێک لە قۆناغە تەواوبووەکانی رێگاکە خراوەتە خزمەتی ھاوڵاتییانەوە.
لەنێو پرۆژەکەدا 35 پرد هەن کە درێژییەکەیان بە چوون و هاتن دەگاتە پێنج کیلۆمەتر و زۆرینەیان تەواوکراون، ھاوکات پردی ئاوە خێری کە گەورەترین پردە لەسەر ئاستی ھەرێمی کوردستان دەکەوێتە نێو پرۆژەکەوە.
