پارێزگاری هەولێر رایدەگەیەنێت، ئێمەش ئەمجارە گومانمان لە رووداوی ئاگركەوتنەوەكەی بازاڕی لەنگە هەیە و لێكۆڵینەوە لە رووداوەكە دەكرێت.
ئومێد خۆشناو، پارێزگاری هەولێر لە كۆنگرەیەكی رۆژنامەوانیدا كە پەیامنێری تۆڕی میدیایی ئێستا ئامادەیبوو رایگەیاند، ئێمەش ئەمجارە گومانمان لە رووداوی ئاگركەوتنەوەكەی بازاڕی لەنگە هەیە و لیژنەی لێكۆڵینەوە لە رووداوەكە پێكهێندراوە و لە چەند رۆژی داهاتوودا ئەنجامەكەی بۆ رایگشتی رادەگەیەنرێت.
وتیشی، “رووداوی ئاگركەوتنەوەكانی پێشتر هۆكارەكانی دیاربوون، بەڵام كۆتا رووداوی ئاگركەوتنەوە لە كامێراكان زۆر بەڵگە هەن و لە نیگەرانی كاسبكارانی بازاڕی لەنگە تێدەگەین و دەست بە چاككردنەوەی شوێنەكە دەكرێت و لە دوای جەژن رێوشوێنەكان بۆ رێكخستنی ئەو بازاڕە دەستپێدەكەین”.
