بافڵ جەلال تاڵەبانی سەرۆکی یەکێتیی نیشتمانیی کوردستان پەیامێکی بڵاوکردەوە و پیرۆزبایی جەژنی قیامە و جەژنی ئەکیتۆ و سەری ساڵی نوێی بابلی لە مەسیحی، کلدانیی سریانی و ئاشوورییەکان کرد.
بافڵ جەلال تاڵەبانی لە پەیامەکەیدا رایگەیاند، بەبۆنەی جەژنی قیامەی حەزرەتی مەسیح (سڵاوی خودای لەسەربێت) جەژنی ئەکیتۆ و سەری ساڵی نوێی بابلی، پیرۆزباییەکی گەرم لە خوشک و برایانی مەسیحی، کلدانیی سریانی و ئاشوورییەکان دەکەم و هیوادارم ئەم جەژنە لە دڵخۆشی و ئارامیدا بەسەربەرن.
هەر لە پەیامەکەیدا هاتووە، لەم بۆنەیەدا جەخت لە سیاسەتی نەگۆڕ و پابەندیی هەمیشەیی یەکێتیی نیشتمانیی کوردستان بۆ قووڵکردنەوەی پێکەوەژیان و پاراستنی مافی هەموو پێکهاتە و ئاینزاکان دەکەمەوە، هەرێمی کوردستان لانکەی ئاشتی و پێکەوەژیان بووە و هەوڵەکانمان بۆ هێشتنەوەی ئەو فرەڕەنگییە بەردەوامدەبێت.
