بەڕێوبەرایەتیی ئاسایشی سلێمانی، لەبارەی ڕوداوەکەی ئەمڕۆ بازگەی تاسڵوجە کە لەنێوان ژمارەیەک پێشمەرگە و ئاسایشی بازگەکە ڕویدا رونکردنەوەیەکی بڵاوکردەوە و ڕایگەیاند کە ئاڵۆزییەکان کۆتاییهاتووە و سەرجەمیان ڕاگیراون.
لە ڕاگەیەنراوی ئاسایشی سلێمانیدا هاتووە، “سەرلەبەیانی ئەمڕۆ 10/2/2021 لە کاتژمێر 10:30 لە بازگەی تاسڵوجەی سەر بە پارێزگای سلێمانی لەکاتی تێپەڕبوونی ئۆتۆمبێلێکی هێزەکانی پێشمەرگە لەنێوان پێشمەرگەکە و کارمەندانی بازگەکە لێکتێنەگەیشتنێک ڕوویدا و لە ئەنجامدا بووە بە دەمەقاڵێ و شەڕ لە نێوانیاندا ڕوویدا”.
ئاماژە بەوەشکراوە کە بە چەقۆ لەلایەن پێشمەرگەکانەوە هێرش کراوەتەسەر چەند کارمەندێکی ئاسایشی بازگەکە و بریندار کراون، هەروەها عەریفی ئاسایش، شاخەوان ئەحمەد مەحمود کارمەندی بازگەکە گیانیلەدەستداوە و پێنجی دیکە بریندار بوون.
لە ڕاگەیەنراوەکەدا هاتووە،”بەهەوڵ و هیمەتی هەموو لایەک کۆتایی بە ئاڵۆزییەکان هێنرا و لیژنەی لێکۆڵینەوە لە ڕووداوەکە پێکهێنراوە بۆ بەرقەرار بوونی یاسا و هەردوو لایەنی هۆکاری ڕووداوەکە بە فەرمانی دادوەر ڕاگیراون”.
