پۆلیسی هۆڵەندا رایگەیاند، کەسێک کە چەکدارە، چووەتە ناو یانەیەکەوە لە شارۆچکەی ئێدێی ناوەڕاستی هۆڵەندا و بە زەبری چەک و تەقەمەنی، چەند کەسێکی بەبارمتە گرتووە.
پۆلیسی هۆڵەندا لە روونکردنەوەیەکدا کە لە تۆڕی کۆمەڵایەتیی ئێکس بڵاویکردەوە ئاماژەی بەوەکرد سێ لە بارمتەکان لە شوێنەکە هاتوونەتەدەرەوە و ئازادکراون، بڵام دۆخەکە تائێستا نائارامە.
باس لەوەشکراوە، نازاندرێت بە دیاریکراوی چەند کەس بە بارمتە گیراون بەڵام وا بڕوادەکرێت چوار بۆ پێنج کەس بن سەرجەمیان.
دۆخێکی ئاڵۆزی ئەمنی لەناوچەکە دروستکراوە و نزیکەی 150 ماڵی چواردەوری ئەو باڵەخانەیەی یانەکەی تێدایە چۆڵکراون.
