بومەلەرزەیەك بە گوڕی 6 پلە دوورگەیەكی ئیندۆنیسیای گرتەوە، بەر لەوەش بەهۆی تەقینەوەیەكی گڕكانەوە كەسێك گیانیلەدەستدا و 41ی دیكە برینداربوون.
بەپێی ناوەندی تۆماری بومەلەرزەی ئەوروپای ناوەند، بومەلەرزەكە باكووری دوورگەی هالماهیرا-ی گرتووەتەوە و گوڕەكەشی 6 پلەی ڕێختەر بووە.
لەلایەكی دیكەوە بەرپرسانی ئیندۆنیسیا ڕایانگەیاند، بەهۆی تەقینەوەی گڕكانی سیمیرۆ لە كەرتی جاوەی ڕۆژهەڵات لە ئیندۆنیسیا، كەسێك گیانیلەدەستداوە و 41ی دیكەش سووتاون و برینەكانیان كاریگەرە.
هەر بە وتەی بەرپرسان، سەرەڕای ئەو ژمارەیە، دوو كەس لەخانەی بێسەروشوێناندان و هەشت كرێكاری تایبەت بە هەڵكۆڵینیش گەمارۆدراون.
تەقینەوەی گڕكانەكە دوێنێ ڕوویداوە، بەهۆیەوە دوكەڵ و لم و گڕ بەرزبووەتەوە و ئەمەش وای لە دانیشتووانی ناوچە نزیكەكان كرد، ماڵ و جێگاكانیان جێبهێڵن.
