وەزارەتی کۆچ و کۆچبەرانی عێراق بڵاویکردەوە، دەستکراوە بە دابەشکردنی بڕی چوار ملیۆن دینار بەسەر هەر خێزانێک کە تازە گەڕاوەتەوە قەزای شەنگال.
وەزارەتی کۆچ و کۆچبەرانی عێراق لە راگەیەندراوێکدا ئەمڕۆ هەینی بڵاویکردەوە، هەر خێزانێکی ئاوارە کە گەڕابێتەوە بەم نزیکانە بۆ زێدی خۆی لە قەزای شەنگال بڕی چوار ملیۆن دیناری وەک هاوکاری پێدەدرێت.
ئاشکراشیکرد، ئامانج لەم هاوکارییە هاندانی ئەو خێزانانەیە کە لە کەمپی ئاوارەکان ماونەتەوە بۆ ئەوەی پێش وادەی داخستنی تەواوەتی کەمپەکان لە 30 تەمموزی ئەمساڵ بگەڕێنەوە زێدی خۆیان.
ئاماژەی بەوەشکرد، ئەو خێزانانەی بڕیاری گەڕانەوە دەدەن هاوکاریی دیکەیان پێشکەشدەکرێت.
