وەزیری دارایی هەرێم رایگەیاند، “لە نزیکترین کاتدا لیستی مووچەی فەرمانبەرانی هەرێم رەوانەی بەغداد دەکەین”.
وەزارەتی دارایی هەرێم لە راگەیەندراوێکدا بڵاویکردەوە، ئەمڕۆ دووشەممە ئاوات شێخ جەناب، وەزیری دارایی و ئابووری لەگەڵ ئاراکاوا میکیهیرۆ، کونسوڵی وڵاتی ژاپۆن لە هەرێمی کوردستان کۆبووەوە.
لە راگەیەندراوەکەی وەزارەتی دارایی هەرێمدا هاتووە، لە کۆبوونەوەکەدا وەزیری دارایی هەرێم کورتەیەکی لەسەر دواین پێشهاتەکانی نێوان هەرێم و بەغداد خستەڕوو، تیشکی خستە سەر بڕیارەکانی دادگای فیدراڵی لەسەر مووچەی فەرمانبەرانی هەرێمی کوردستان و رایگەیاند، هەموو ئامادەسازییەکانمان بۆ لابردنی لەمپەرەکانی بەردەم ناردنی مووچەی فەرمانبەرانی هەرێمی کوردستان لەلایەن بەغدادەوە کردووە.
ئاوات شێخ جەناب رایگەیاند، راپۆرتی تەرازووی پێداچوونەوەی مانگی رابردوومان ناردووەو لە نزیکترین کاتدا لیستی مووچەی فەرمانبەران رەوانەی وەزارەتی دارایی عێراق دەکرێت .
وەزیری دارایی هەرێم دەشڵێت، “هۆکاری دواکەوتنی ناردنی لیستی مووچەی فەرمانبەران پەیوەندی بە هەندێک ئاستەنگی هونەری و داواکارییە نوێیەکانی وەزارەتی دارایی عێراقەوە هەبوو کە دەستکراوە بە جێبەجێکردنیان”.
