یەکێک لە نوێنەرانی مامۆستایانی ناڕازی رایگەیاند، ئەمڕۆ پێنجشەممە لە شەقامی سالم (سەهۆڵەکە)، کاتژمێر 04:00ی ئێوارە، ئاهەنگی سەرکەوتن دەگێڕن.
دڵشاد میرانی یەکێک لە نوێنەرانی مامۆستایانی ناڕازی ئاماژەی بەوەکرد، بڕیاریان داوە ئەمڕۆ ئاهەنگێکی گەورەی جەماوەریی لەپای ئەو سەرکەوتنەی خۆپیشاندانەکان و دەربڕینی خۆشی دەگێڕن و سلێمانی ئامێز بۆ هەموو شارەکان دەکاتەوە.
باسی لەوەشکرد، بڕیارەکانی دادگای فیدڕاڵی سەرکەوتنی خەڵکی هەرێمی کوردستانە، گێڕانەوەی مافی موچەخۆرانە کە بەهۆی ئابوری سەربەخۆوە توشی زیانێکی گەورە بوون و 38 مووچەی مووچەخۆران کەوتە لای حکومەت.
باسی لەوەشکرد، 14جار سەردانی بەغدادیان کردووە و چەندین سکاڵایان تۆمارکرد، تا مافی مووچەخۆران لە لایەن حکومەتی هەرێمی کوردستانەوە زەوت نەکرێت، راشیگەیاند 83 خۆپیشاندان لە سنوری سلێمانی و هەڵەبجە و سنوری راپەڕین و چەند شوێنێکی دیکە کران، بڕیارەکەی دادگاش بە هەوڵی خۆمان دەزانین.
جەختی لەوەشکردەوە، چیتر مووچەی فەرمانبەرانی هەرێم نابێتە بەرداشی نێوان حکومەتی عێراق و حکومەتی هەرێم و مووچەخۆرانی هەرێم راستەوخۆ مووچەکانیان وەردەگرن.
