بافڵ جەلال تاڵەبانی، سەرۆكی یەكێتیی نیشتمانیی كوردستان لە بەغداد چاویكەوت بە سەید عەمار حەكیم، سەرۆكی رەوتی حیكمە.
لە دیدارێكدا دوایین گۆڕانكارییە سیاسییەكان گفتوگۆیان لەبارەوەكرا و جەخت لە یەكخستنی هەوڵە نیشتمانییەكان كرایەوە لەپێناو پاراستنی سەقامگیریی وڵات و چارەسەركردنی ئەو كێشانەی بەربەست لەبەردەم پرۆسەی سیاسیدا دروستدەكەن.
لە درێژەی دیدارەكەدا چارەسەركردنی دەستوورییانەی كێشەكانی نێوان حكومەتی هەرێمی كوردستان و ناوەند جەختیلێكرایەوە، بە شێوەیەك هەموو هەوڵەكان لەپێناو گەیشتن بە ئەنجامێكی ئەرێنی، پاراستنی مافی مووچەخۆران بێت و ژیانی خەڵك نەكرێتە قوربانیی ناكۆكی و ململانێ سیاسییەكان.
گرژی و ئاڵۆزییەكانی رۆژهەڵاتی ناوەڕاست تەوەرێكیتری دیدارەكە بوو و لەوبارەیەوە سەرۆك بافڵ رایگەیاند، “ناوچەكە بە دۆخێكی ناهەمواردا تێدەپەڕێت، پێویستە هەمووان هەنگاوی سیاسیی دروست بنێن و بەرپرسیارانە مامەڵە بكەن و دەبێت هەموولایەك رێگری لەوە بكەن وڵات ببێتە گۆڕەپانی یەكلاییكردنەوەی ململانێ دەرەكییەكان، ئەمەش ئەو ئامانجە باڵایەیە كە ئێمە هەوڵی بۆ دەدەین”.
