پاڵپشت بە زانیاری هەواڵگری، دژەتیرۆر و هاوپەیمانان دوو تیرۆریست دەستگیردەكەن.
لە ئۆپەراسیۆنێكی هاوبەشی هێزەكانی بەڕێوەبەرایەتیی گشتیی دژەتیرۆر و هێزەكانی هاوپەیمانان، لە سنووری قەزای چەمچەماڵ دوو تیرۆریستی داواكراو دەستگیركران.
یەكێك لە تیرۆریستانی دەستگیركراو لەدایكبووی ساڵی 1992ـی موسڵە و بەپلەی ئەمیری تیرۆریستی دەوڵەتی ئیسلامی بەناو ویلایەتی موسڵ كاریكردووە و لەگەڵ دەستپێكی هەڵمەتی ئازادكردنی موسڵدا لە شارەكە هەڵاتووە.
ئەوەی دیكەشیان لەدایكبووی ئەسكەندەرییەی بابل بووە، پێشینەی كاری تیرۆری هەبووە و دوای دەستگیركردنیان، رادەستی یاسا كران بە مەبەستی سزادانیان.
شایەنی باسە، بەڕێوەبەرایەتیی گشتیی دژەتیرۆر و هێزەكانی هاوپەیمانان بەردەوام هەماهەنگییان لە رووبەڕووبونەوەی مەترسییەكانی تیرۆردا هەبووە و ئامانج لەم ئۆپەرسیۆنانەدا بریتییە لە لەناوبردنی مەترسییەكانی شانە نووستووەكانی تیرۆریستان و رووبەڕووبوونەوەی هەر مەترسییەكی تیرۆر لەسەر سەلامەتی و گیان و ماڵی هاوڵاتییان.
