دوای هێرشەکەی سەر کێڵگەی گازیی کۆرمۆر لە شەوی رابردوودا، هێرشەکە بێ وەڵام تێپەڕنەبوو، بە چوار مووشەک وەڵامدرایەوە و ئاڕاستەی ئەو ناوچەیە کرا کە مووشەکەکانی لێوە ئاڕەستە کرابوو.
بە گوێرەی ئەو زانیارییانەی تۆڕی میدیای ئێستا لە سەرچاوەیەکی ئەمنیی سلێمانییەوە زانیویەتی، هێرشەکانی سەر کۆرمۆر بێ وەڵام تێپەڕنەبوون و بەرەبەیانی ئەمڕۆ هەینی بەچوار مووشەک وەڵام دراونەتەوە.
سەرچاوە ئەمنییەکە هەواڵەکەی پشتڕاستکردەوە و وتیشی، “بڕیاردرا لە وەڵامی ئەو هێرشە مووشەکییەی کە ئاڕاستەی کێڵگەی گازی کۆرمۆر کرا، چوار مووشەک ئاڕاستەی ئەو ناوچەیە بکرێت کە مووشەکەکانی لێوە ئاڕاستەکرابوو و هیچ هێرشێک بۆ سەر هاونیشتیمانیانمان قبوڵ ناکەین.”
ئەمەش لە دوای ئەوە دێت، شەوی پێنجشەممە، بە مووشەک هێرشکرایە سەر کێڵگەی گازی کۆرمۆر لە ناوچەی قادرکەرەمى سەر بە چەمچەماڵی شاری سلێمانی.
