سکرتێری گشتیی نەتەوەیەکگرتووەکان رایگەیاند، بارودۆخی ناوچەی رۆژهەڵاتی ناوەڕاست وەک بەرمیلێک سووتەمەنی وایە کە خەریکە دەتەقێتەوە و دەشڵێت، “پێویستە بە زووترین کات رێگری لەو تەقینەوەیە بکرێت.”
ئەنتۆنیۆ گوتیرێس سکرتێری گشتیی نەتەوەیەکگرتووەکان لە راگەیەندراوێکدا ئاماژەی بەوەکردووە، پێویستە هەموو شتێک بکرێت بۆ ئارامکردنەوەی دۆخی ناوچەی رۆژهەڵاتی ناوەڕاست و یەکەم هەنگاویش بە ئاگربەستی غەزە دەست پێدەکات.
گوتیرێس لە درێژەی قسەکانیدا ئەوەشی دووپاتکردەوە، پێویستە دەستبەجێ ئاگربەستێکی مرۆیی سازبکرێت بۆ کەمکردنەوەی ئازارەکانی غەززە و رێگەدان بە گەیشتنی هاوکارییەکان بۆ ئەوانەی پێویستیان پێیەتی و ئاسانکاری بۆ ئازادکردنی بارمتەکان بکرێت.
