سەرۆککۆماری ئێران پەیامێک ئاراستەی ئەمریکا دەکات و دەڵێت، بە چی گوناهێک 160 منداڵی خوێندنگەیەکتان لە میناب کوشت؟
مەسعود پزیشکیان، سەرۆککۆماری ئێران لە تۆڕی کۆمەڵایەتیی ئێکس نووسیویەتی، ئەوانەی بانگەشەی ئاشتییان بۆ جیهان دەکرد، بە شێوازێکی دڕندانە خوێندنگە، نەخۆشخانە و یاریگەی وەرزشییان بۆردومانکرد و تەنیا لە حاڵەتێکدا، 160 منداڵی بچووکیان لە میناب کۆمەڵکوژکرد.
نووسیویشیەتی، “ئەوانەی ئەم کارەساتانە دەبینن و بێدەنگ دەبن، هاوبەشی ئەم تاوانانەن؛ بە چی گوناهێک کوژران؟”.
لە ڕۆژانی سەرەتای جەنگی ئەمریکا و ئیسرائیل لەگەڵ ئێران، خوێندنگەیەک لە شاری میناب بەچڕی بۆردومانکرا و بەهۆیەوە [وەک میدیاکانی ئێران باسیان کردووە] لانیکەم 160 خوێندکار گیانیان لەدەستدا و ژمارەیەکی دیکەش برینداربوون.
