وەزیری دارایی هەرێم رایدەگەیەنێت، هەموو هەوڵەكانمان بە ئاڕاستەی چارەسەركردنی كێشەكانە لەگەڵ عێراقدا.
بەپێی راگەیەندراوێكی وەزارەتی دارایی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، ئەمڕۆ سێشەممە، ئاوات جەناب نوری وەزیری دارایی پێشوازیكرد لە هیثم الحسنی راوێژكاری ئابوریی سەرۆك وەزیرانی عێراق و سەرۆكی تیمی ڕێكخستنی بەڕێوەبردنی دارایی لە عێراق.
بەپێی راگەیەندراوەكە لە دیدارێكدا گفتوگۆ لەسەر ئەو پەرەسەندنانە كرا كە لە ئەنجامی سەردانە بەردەوامەكانی وەفدی هەرێمی كوردستان بە مەبەستی چارەسەركردنی كێشەی دەروازە سنووریيەكان و یەكخستنی سیاسەتی گومرگی و دوایین سەردانی وەفدەكەش كە ئامانج لێی چارەسەری پرسی مووچە و لابردنی ئەو ئاستەنگانەی لە بەردەمیدان لە رێگای هەمواری یاسای بودجەوە هاتووەتە ئاراوە.
هەر لە راگەیەندراوەكەدا هاتووە، وەزیری دارایی و ئابوری رایگەیاندووە، هەموو هەوڵەكانیان بۆ چارەسەری كێشەكان لەگەڵ حكومەتی عێراق خستووەتەگەڕ و وەك یەك تیم لەگەڵ لیژنە هاوبەشەكانی دیوانی چاودێریی دارایی عێراق و هەرێمی كوردستان كاریان كردووە تا هەردوولا بتوانن بەیەك سیستمی ژمێریاری كارەكانیان ئەنجامبدەن.
