سەرۆكایەتیی شارەوانیی سلێمانی بڵاویكردووەتەوە، رێنماییە نوێیەكان بۆ پێدانی مۆڵەتی بینا هەمواركرایەوە.
بەپێی راگەیەندراوێكی سەرۆكایەتیی شارەوانیی سلێمانی كە وێنەیەكی دەست تۆڕی میدیایی ئێستا كەوتووە و تێیدا هاتووە، بە مەبەستی ئاسانكاریكردنی مامەڵەی هاوڵاتییان و رێكخستنەوەی تەواوی كارەكانی جۆرەكانی مۆڵەت، خۆشبەختانە، دوای چەندین مانگ كاركردنی تیمی ئەندازیاریی بەش و جۆرە جیاوازەكانی مۆڵەت، نووسراو ئاراستەی وەزارەتی شارەوانی و گەشتوگوزار كرا.
لە راگەیەندراوەكەدا هاتووە، بە دەستخۆشییەوە بە هەوڵ و ماندووبوونی هەموو لایەك رێنماییەكان لەلایەن وەزارەت و ئەنجومەنی شارەوانیی سلێمانییەوە پەسەندكران و جێی خۆیەتی، ئاماژە بەوەبكەین ئەم كارە گرنگە چەندین بەربەستی كۆنی لەسەر رێگای مامەڵەی هاوڵاتییان لابرد و رۆڵ دەبینێت لە ڕێكخستنەوەی شار و جۆرێك ئاسانكاری بۆ هاوڵاتییان، لە ئێستادا رێنماییە نوێیەكانی پێدانی مۆڵەت كاری پێدەكرێت.
