مامۆستایانی ناڕازی دەربارەی ئەنجامی كۆبوونەوەیان لەگەڵ محەمەد شیاع سودانی و پرسی شكاندنی بایكۆت دەدوێن.
مامۆستایانی ناڕازی لە كۆنگرەیەكی رۆژنامەنووسیدا راگەیەندراوێكیان لەبارەی سەردانی دوێنێ وەفدێكیان بۆ بەغداد و دیداریان لەگەڵ محەمەد شیاع سودانی، سەرۆك وەزیرانی عێراق وەك نوێنەری فەرمانبەر و مامۆستایان خوێندەوە و تیایدا هاتووە، داوای رەوای مووچەخۆران و، دۆخی خراپی مووچەخۆرانیان لە رووی دواكەوتنی مووچە و راگرتنی پلەبەرزكردنەوە روونكردەوە و داوایانكردووە مووچە بە نیشتمانی بكرێت، مووچەی خانەنشینانی هەرێم هاوتای خانەنشینانی پارێزگاكانی دیكەی عێراق بكرێت و هاوڵاتییان سوودمەندبن لە خزمەتگوزاریی بانكی و ئەودوای خزمەتگوزارییەكانی دیكەی حكومەتی ناوەند.
لە بەرامبەردا سودانی گوێی لە داواكارییەكانی مامۆستایان گرت و بە داواكاری رەوا ناویبردن و رایگەیاند، بەپێی خشتەیەكی زەمەنی جێبەجێیان دەكات، وەك ئەوەی لە بەشێكی دیكەی راگەیەندراوی كۆنگرە رۆژنامەنووسیەكەدا هاتووە.
ئەوەشی خستەڕوو، سودانی هەر لەوێ بڕیار و بەڵێنیدا كە (بۆ ساڵی نوێ كێشەی دواكەوتنی مووچەی فەرمانبەران چارەسەربكات، هەمواری یاسایی بودجە لە حكومەت ئامادەیە و لە 9ی كانونی دووەم لە ئەنجومەنی نوێنەران دەبێت بۆ پەسەندكردنی، مامەڵەی یەكسان لەگەڵ فەرمانبەرانی سەرجەم پارێزگاكان دەكات، لقی بانكی رەشید و رافیدەین لە هەرێمی كوردستان دەكاتەوە، فشار دەخاتە سەر هەرێمی كوردستان بۆ پلەبەرزكردنەوە و دامەزراندنی مامۆستایانی وانەبێژ و چارەسەری جیاوازی نرخی سووتەمەنی و بەشە خۆراك).
