لیژنەی باڵای ئەمنی بۆ هەڵبژاردنی ئەنجومەنی پارێزگاکانی عێراق ڕاگەیەندراوێکی سەبارەت بە ئامادەکارییەکان بۆ دەنگدانی گشتیی سبەینێ بڵاوکردەوە و دەڵێت، “تەواوی ئامادەکارییەکان بۆ هەڵبژاردنی دووشەممە تەواوبوون”.
لیوا قەیس محەمەداوی، جێگری فەرماندەی ئۆپەراسیۆنە هاوبەشەکان و سەرۆکی لیژنەی باڵای ئەمنی بۆ هەڵبژاردنی ئەنجومەنی پارێزگاکانی عێراق، لە بەیاننامەیەکدا رایگەیاند، “بە ئیرادەی ئەندامانی ئازای هێزە ئەمنییەکانمان و ئیرادەی بەرزی هاوڵاتییان یەکە ئەمنییەکانمان بە کاری قارەمانانە و نیشتمانپەروەرانەی خۆیان هەستان و پلانی پاراستنی ناوەندە تایبەتەکانی دەنگدانیان جێبەجێکرد بەبێ ئەوەی هیچ سەرپێچییەک رووبدات کە بەڕێوەچوونی پڕۆسەی هەڵبژاردن پەکبخات”.
ئەوەشی خستەڕوو، “هەروەک چۆن دوێنێ هێزە ئەمنییەکان بە بەرپرسیارێتی نیشتمانی خۆیان هەستان، سبەینێش بەهەمان شێوە پلانە ئەمنی و تەکنیکییەکان بەردەوامە بۆ پاراستنی ئەو دەنگدانە گشتیەی کە سبەینێ ئەنجام دەدرێت.”
سەرۆکی لیژنەی باڵای ئەمنی دەشڵێت، “وەک لیژنەی باڵای ئەمنی پلانە ئەمنییەکانی خۆمان بۆ جێگیرکردن و دابەشکردنی هێزەکان و پاراستنی وڵات تەواوکردووە و بەتەواوی ئامادەین”.
