سەركردەیەكی هاوپەیمانیی عەزم رایدەگەیەنێت، ئەنجومەنی نوێنەران پرسی سەرۆكی نوێ یەكلادەكاتەوە و دەشڵێت، زیاتر لە پاڵێوراوێك بۆ ئەو پۆستە هەیە.
فارس ئەلفارس، سەركردەی هاوپەیمانێتییەكە رایگەیاند، كۆدەنگیی سیاسی و پەرلەمانی هەیە بۆ هەڵبژاردنی سەرۆكی نوێی ئەنجومەنی نوێنەران لە دانیشتنی سبەینێدا، باوەڕمانوایە ئەنجومەن سەركەوتوو دەبێت لەو ئەركەدا، رەنگیشە یەكلاكردنەوەی هەڵبژاردنی زیاتر لە گەڕێكی پێویست بێت.
فارس لە لێدوانێكی رۆژنامەوانیدا وتیشی، “زیاتر لە پاڵێوراوێك بۆ پۆستی سەرۆك هەیە، كە سەر بە چەند لایەنێكی سیاسیین”.
تائێستا رێككەوتنی كۆتایی لەئارادانییە لەسەر تەنها پاڵێوراوێك، پێدەچێت یەكلاكردنەوەی لەنێو هۆڵی ئەنجومەن و بە دەنگی پەرلەمانتاران بێت، وەك ئەوەی ئەو سەركردەیەی سوننە ئاماژەی پێدا.
دوێنێ ئەنجومەنی نوێنەران عێراق بڕیاریدا بڕگەیەكی دانیشتنی سبەی تەرخانبكات بۆ هەڵبژاردنی جێگرەوەی محەمەد حەلبوسی.
لە 14ی ئەم مانگە دادگای باڵای فیدراڵی بڕیاریدا بە كۆتاییهێنان بە ئەندامێتیی محەمەد رێكان حەلبوسی لە ئەنجومەنی نوێنەران بەهۆی “لادان” لە دەستپێكێشانەوەی لەیس دلێمی-ی پەرلەمانتار.
