لەدوای دەرچوونی بڕیاری دوورخستنەوەی محەمەد حەلبوسی لە پۆستی سەرۆکی ئەنجومەنی نوێنەرانی عێراق، سێ وەزیریش داوای دەستلەکارکێشانەوەیان پێشکەشکرد.
بەپێی ئەو بەڵگانەی میدیا عێراقییەکان بڵاویانکردووەتەوە، لە کاردانەوەی بڕیاری دوورخستنەوەی محەمەد حەلبوسی سەرۆکی ئەنجومەنی نوێنەران لەلایەن دادگای باڵای فیدڕاڵییەوە، وەزیرانی پلاندانان و پیشەسازی و رۆشنبیری نامەی دەستلەکارکێشانەوەیان پێشکەشکردووە.
هەرسێ وەزیرەکە سەر بە هاوپەیمانێتی پێشکەوتنن و لەنامەی دەستلەکارکێشانەوەکەشیاندا ئاشکرایانکردووە، وەک کاردانەوەیەک لە بڕیارەکەی دادگای باڵای فیدڕاڵی ئەو بڕیارەیان داوە.
