ڕەشنووسی پڕۆژە یاسای سەربازیی زۆرەملێ ئامادەیە و دەدرێت بە ئەنجومەنی نوێنەران، ئەگەر پەسەندبكرێت، خزمەتی سەربازی بۆ گەنجان دەبێت بە ناچاری.
وەزارەتی بەرگریی عێراق، ڕەشنووسی پڕۆژە یاسای سەربازیی زۆرەملێی تەواوكردووە، ڕەوانەی ئەنجومەنی وەزیرانی دەكات بۆ ئەوەی پەسەندیبكات و بینێرێتە ئەنجومەنی نوێنەران، بە پەسەندكردنی پڕۆژە یاساكە، سەربازی دەكرێت بە ئەرك بەسەر هاوڵاتییانی سەرجەم پارێزگاكانی عێراقەوە.
موزڕ كورەوی ئەندامی ئەنجومەنی نوێنەران دەڵێت، “مووچە دەدرێت بەو كەسانەی خزمەتی سەربازی دەكەن و سێ هۆكار بڕی مووچەكە دیاریدەكەن، ژمارەی سەربازەكان و بڕوانامەكانیان و باری ئابوریی وڵات”.
بەپێی وتەی پەرلەمانتارەكە، پڕۆژە یاساكە پەسەند دەكرێت و خزمەتی زۆرەملێی سەربازیی دەگەڕێتەوە، بەڵام وەك خۆی دەڵێت، پێناچێت بەمنزیكانە ئەوە ڕووبدات و ئامادەسازییەكەی چەند ساڵێكی پێویستە، “چونكە پەیڕەوكردنی خزمەتی سەربازی، پێویستی بە سیستمی كارگێڕیی گشتگیر و بوونی سەربازگەی مەشق و ڕاهێنانە لە گشت پارێزگاكانی عێراقدا”.
پێشتر خالد عوبەیدی وەزیری پێشووتری بەرگریی عێراق، دەستپێشخەریی كردبوو سەربازیی زۆرەملێ بگەڕێتەوە و لە ئەنجومەنی نوێنەران ڕایگەیاندبوو، “مووچە و ئیمتیازاتی سەرباز هێندە زۆردەبن هاوڵاتی نەك لە جێبەجێكردنی ئەركەكە هەڵبێت، بەڵكو دڵخۆشبێت بەوەی ببێت بە سەرباز”.
