سەرۆكی لیستی هاوپەیمانیی كەركوك هێز و ئیرادەمانە رایدەگەیەنێت، لە كەركوك مەترسیی گەورە لەسەر ئاییندەی كورد هەیە و دەشڵێت، “هەڵبژاردنی ئەنجومەنی پارێزگاكان دەرفەتێكە بۆ ئەوەی ناسنامەی كوردبوونی شارەكە بپارێزین”.
رێبوار تەها سەرۆكی لیستی هاوپەیمانیی كەركوك هێز و ئیرادەمانە لە لێدوانێكدا بە تۆڕی میدیایی ئێستای راگەیاند، جیاكاری لە گەیاندنی پڕۆژە خزمەتگوزارییەكان لە نێوان گەڕەكە كوردییەكان و گەڕەكانی دیكە دەكرێت و زۆرینەی پۆستەكان لە كەركوك لە كورد سەندراونەتەوە.
وتیشی، “لە كەركوك مەترسیی گەورە لەسەر ئاییندەی كورد هەیە و ئەنجومەنی پارێزگا ئەو شوێنەیە دەتوانین سەرجەم ئەو مەترسییانە دووربخەینەوە، چونكەی ئیدارەی ئێستای كەركوك كۆنترۆڵی تەواوی دەسەڵاتی شارەكەی كردووە و خزمەتی كورد لەم شارە ناكرێت”.
راشیگەیاند، هەڵبژاردنی ئەنجومەنی پارێزگاكان دەرفەتێكە بۆ پاراستنی ناسنامەی شارەكە و كاتی ئەوەیە كورد بەشداریی هەڵبژاردن بكات و ئێمە رقمان لە هیچ كەسێك نییە و بڕوامان بە پێكەوە ژیان و هاوسەنگی هەیە، بەڵام مەترسییەكی گەورە لەسەر شاری كەركوك هەیە و كاتی ئەوە هاتووە بە دەنگدان مەترسییەكان دووربخەینەوە و شێوازی حكومڕانی بخرێتە خزمەتی سەرجەم هاوڵاتییانەوە بەبێ جیاوازی.
