وتەبێژی حكومەتی هەرێم رایدەگەیەنێت، بڕیاربوو هەفتەی رابردوو 700 ملیار دینارەكەی بەغداد بۆ مووچەی فەرمانبەرانی هەرێمی كوردستان بنێردرێت و دەست بە دابەشكردنی مووچە بكەین، بەڵام جارێكی دیكە پێچەوانەی هەموو لێدوان و قسەو باسی ناو كۆبوونەوەكان و ڕێككەوتنەكان ناردنی پارەكە دواكەوت.
پێشەوا هەورامانی وتەبێژی حكومەتی هەرێم پەیامێكی بڵاوكردەوە و دەڵێت بڕیاروابوو هەفتەی رابردوو بڕی 700 ملیار دیناری مووچەی فەرمانبەرانی هەرێمی كوردستان بنێردرێت و دەست بە دابەشكردنی مووچە بكەین، بەڵام جارێكی دیكە پێچەوانەی هەموو لێدوان و قسە و باسی ناو كۆبوونەوەكان و رێككەوتنەكان ناردنی پارەكە دواكەوت.
دەشڵێت، “ئەم هەفتەیە شاندی هەرێم دەچنەوە بەغداد و ڕۆژی سێشەممە حكومەتی فیدراڵ كۆبوونەوەی هەیە، دەمانەوێت كە بڕیارێكی كۆتایی و ریشەیی لەم بارەیەوە بدرێت و فەرمانبەرانی هەرێمی كوردستان نەخرێنەوە ناڕەحەتی و سەختییەوە”.
وتەبێژی حكومەتی هەرێم لە پەیامەكەیدا راشیگەیاندووە كە لە ماوەی ڕابردوو نییەتی روونی حكومەتی هەرێم نیشاندرا بۆ رێككەوتن و گەیشتنە ئەنجام لەگەڵ حكومەتی فیدراڵ و هیچ شتێك لەسەر ئێمە نەماوە كە ئەنجامیبدەین، بەڵام ئەگەر دۆخەكە بەمجۆرە بەردەوامبێت، لە بەرامبەر پێشێلكردنی مافی دەستووری خەڵكی هەرێمی كوردستان ناتوانین بێدەنگ بین.
