وەزارەتی سامانە سروشتییەکانی هەرێم رایگەیاند، رۆژانە یەک ملیۆن و 872 هەزار لیتر بەنزینی جۆری نۆرماڵ بۆ پارێزگا و ئیدارە سەربەخۆکانی هەرێم دابین دەکەین.
وەزارەتی سامانە سروشتییەكانی هەرێمی کوردستان لە راگەیاندراوێکدا بڵاویکردەوە، رۆژانە راستەوخۆ یەک ملیۆن و 872 هەزار لیتر بەنزینی جۆری نۆرماڵ بە نرخی 750 دینار دابین دەکەین و لە ڕێگای تیمەکانی بەڕێوەبەرایەتییەكانی نەوت و كانزاكانی پارێزگا و ئیدارە سەربەخۆكانەوە دابەش دەكرێت.
باس لەوەشدەکات، مۆڵەت بەكۆمپانیا و بەنزینخانەكانیش داوە بە مەرج و رێنماییەكانی وەزارەت و بەكوالێتییەكی باش بەنزین دابین بكەن .
پەیوەست بە پڕۆسەی دابەشكردنی نەوتی سپی بەسەر ماڵاندا، وەزارەتەکە دەڵێت، توانراوە لەماوەیەكی كەمدا پرۆسەی دابەشكردنی نەوتی سپی بەسەركەوتوویی بەسەر ماڵاندا جێبەجێ بكرێت و نرخیش لەبازاڕدا ڕووی لەدابەزینە.
بەپێی ئاماری وەزارەتەکە، لەماوەی 10 رۆژدا 73 ملیۆن و448 هەزار و622 لیتر نەوتی سپی دابین کراوە و بڕی 40 ملیۆن و 787 هەزار لیتر لە ناوچە شاخاوییەكان دابەشكراوە ، 203 هەزار و 935 خێزان لە و نەوتە سوودمەندبوون.
