سەرۆكی هەرێمی كوردستان و پارێزگاری بانكی ناوەندیی عێراق لە هەولێر كۆبوونەوە و دۆخی دارایی، بەهای دیناری عێراقی و هەوڵەكانی بانكی ناوەندی بۆ سەقامگیریی دارایی لە عێراق گفتوگۆیان لەبارەوەكراوە.
بەپێی راگەیەندراوێكی سەرۆكایەتیی هەرێمی كوردستان كە وێنەیەكی دەست تۆڕی میدیایی ئێستا كەوتووە و تێیدا هاتووە، ئەمڕۆ پێنجشەممە، نێچیرڤان بارزانی، سەرۆكی هەرێمی كوردستان و عەلی عەلاق، پارێزگاری بانكی ناوەندیی عێراق، لە كۆبوونەوەیەكدا جەختیان لە گرنگیی هاوكاری و هاوئاهەنگیی بانكەكان لە عێراق و هەرێمی كوردستان لەگەڵ بانكی ناوەندیی عێراق كردەوە.
لە راگەیەندراوەكەدا هاتووە، سەرۆكی هەرێمی كوردستان “پێزانینی خۆی” بۆ هەوڵەكانی بانكی ناوەندیی عێراق دەربڕی لە رووبەڕووبوونەوەی ئاڵنگارییەكان و راگرتنی بەهای دینار.
هەر لە راگەیەندراوەكەدا هاتووە، نێچیرڤان بارزانی ئاماژەی بە كارە لەپێشینەكانی بانكی ناوەندیی عێراق كرد بۆ چۆنییەتیی مامەڵەكردن لەگەڵ ئاڵنگارییەكاندا و چارەسەركردنی كێشەكانی نەختینە و دارایی.
