یانەی ڕیاڵ مەدرید لە گواستنەوەکانی زستانی 2021 باشتر لە گواستنەوەکانی ڕابردوو جموجۆڵ دەکات و بۆ ئەم مەبەستەش سێ یاریزانیان دیاریکردووە.
بەپێی زانیارییەکانی ڕۆژنامەی موندۆ دیپۆرتیڤۆی ئیسپانی، فلۆرنتینۆ پێرێز و هاوکارانی لە میرکاتۆی زستانی 2021 هەنگاو و گواستنەوەی هەژێنەر ئەنجامنادەن، بەڵکو گرنگی بە سێ یاریزانی پشتگوێخراو دەدەن، ئەو سێ یاریزانەش ڕەنگە گواستنەوەیان بکەوێتە هاوینی 2021.
یەکەم داواکراو بریتییە لە داڤید ئالابای بەرگریکاری یانەی بایرن میونشن، ئەستێرەکەی نەمسا بۆندەکەی بەرەو کۆتاییدەچێت و تاوەکو ئێستا بۆندی نوێی واژوو نەکردووە و پێناچێت ئەم هەنهاوە بنێت، بەم هۆیەوە گواستنەوەی بۆ یانەی شاهانە لە هاوینی 2021 دەبێتە بێبەرانبەر و پێشوەخت لە میرکاتۆی زستان دەتوانن دانوستاندنی لەگەڵدا بکەن.
لەگەڵ دابەزینی ئاستی مارسێلۆ و ڤاران، دەکرێت ئالابا لەهەردوو پێگەی سەنتەر و باڵەکانی بەرگری پشتی پێببەسترێت.
یەکێکی دیکە لە داواکراوەکانی یانەی شاهانە بریتیە لە نونۆ مێندێزی باڵی بەرگری چەپی یانەی سپۆرتینگ لشبۆنە، کە تەمەنی تەنها 18 ساڵە.
کۆتا یاریزانی داواکراویش بریتیە لە کریستیان ئیریکسن، کە لە یانەی ئینتەرمیلان خراوەتە لیستی فرۆشراوانەوە و لە پلانەکانی ئەنتۆنیۆ کۆنتیدا نەماوە.
لە بەرانبەردا چەند یاریزانێک ناویان لە لیستی فرۆشراواندا هاتووە، لە نمونەی ئیسکۆ و لوکا یوڤیچ.
