زۆر کەس بەهۆی فشارەکانی ژیانی رۆژانەیانەوە کەمتر لەو ماوەیەی کە پێشنیارکراوە دەخەون، شارەزایانیش دەڵێن خراپی خەو هەڵەی ژمارە یەکە بۆئەوەی وابکات خێراتر پیر ببیت.
نیل بۆلڤین پزیشکی پسپۆڕی نوێکردنەوە و دووبارە دروستکردنەوە دەڵێت، “لەدەستدانی خەوی باش بە شێوەیەکی بەردەوام دەتوانێت رۆڵی گەورەی لە بەرەوپێشچوونی تەمەن و پیر دەرکەوتندا هەبێت”.
بۆلڤین باس لەوەدەکات، “بە پشتبەستن بە ئەزموونەکەم، بۆم دەرکەوتووە کە خراپی کوالێتیی خەو هەڵەی ژمارە یەکە کە دەبێتە هۆی خێراتر پیربوونت، خەوێکی باش کلیلی ژیانێکی تەندروستە”.
خەوتن 7 بۆ 8 کاتژمێر لە شەوێکدا یارمەتی باشترکردنی تەندروستیی خانە و شانەکان، کارکردنی توانای تێگەیشتن، بەرگری ، ئاستی وزە، و میتابۆلیزم دەدات .
دەزگای تەندروستیی نیشتمانیی بەریتانیا پێشنیاری ئەوە دەکات کە گەورەکان هەموو شەوێک لانیکەم 7 بۆ 9 کاتژمێر بخەون.
هەرزەکاران و منداڵان و کۆرپە پێویستیان بە خەوی زیاترە چونکە هێشتا لە گەشەکردندان، منداڵێکی تازە لەدایکبوو پێویستی بە 8 بۆ 16 کاتژمێر نووستنە لە رۆژێکدا.
کۆلاجین و ئیلاستین دوو پرۆتینن کە یارمەتیدەرن بۆ ئەوەی پێست بە توندی بمێنێتەوە و دووربێت لە چرچ و لۆچی.
توێژینەوەکان دەریدەخەن کەمخەوی دەبێتە هۆی کەمکردنەوەی کوالیتی و بەهێزی هەردوو پرۆتینەکە و دەبێتە هۆی دروستبوونی هێڵ و چرچ و لۆچی.
